تجربتي في شراء الاثاث من ايكيا

كنت قد وفقت في الاتفاق على ايجار اول شقه لي في كندا وبدأنا الاستعداد للانتقال اليها بدايه من الشهر التالي .. كما تعلمون فالشقق في كندا تكون في العاده غير مؤثثه فقط يوجد ثلاجة وبوتاجاز في الشقه كما توجد حجرة خاصه بالغسيل في العماره تحتوي على غسالات ومجففات بالعمله .. هنا بدأت التفكير والبحث عن محل يمكنني شراء الاثاث منه بجوده واسعار معقولة للفترة الاولى .. عن نفسي كنت رافض تماما فكرة الاثاث المستعمل لصعوبة إيجاد كل ما تبحث عنه ومشقة نقله الى محل سكني وخوفي من حشرات الفراش Bed Bugs وهي منتشرة بكندا ومشكلتها اذا دخلت البيت يصعب التخلص منها حتى بالاستعانة بشركات متخصصة والتخلص من كل الاثاث بالبيت .. هناك محلات كثيرة يمكن شراء الاثاث مثل IKEA و The Brick وغيرهما كما توجد محلات اصغر ليس لها فروع وهي تختلف في الجوده والسعر من محل لآخر كما ان قسم الاثاث في Walmart يحتوي على بعض الاثاث البسيط بأسعار مناسبه جدا .. بعد المقارنه بحسب السعر والاختيارات المتاحة ونظام التوصيل للمنزل استقرينا على ايكيا

الخطوة الاولى لما بتدخل ايكيا تروح على الShowroom .. هاتلاقي صالة العرض مقسمة لاجزاء زي قسم غرف المعيشة ، غرف السفرة ، المكاتب ، المطابخ ، غرف النوم ، غرف الاطفال .. الخ وكمان في اقسام تانية خاصة بادوات المطبخ والمفروشات والديكورات.

وانت داخل هاتلاقيهم حاطين ورق الshopping list واقلام ، خد واحدة من الShopping List وابدأ اتفرج على المعروضات.

في صالة العرض تقدر تقارن وتجرب الاثاث .. .. لو في حاجة من دول عجبتك بتكتب في ال Shopping List اللي معاك اسم المنتج ورقمه، سعره، عدد القطع اللي انتا محتاجها، ومكانه في المخزن Aisle and Bin ..كل قطع الاثاث عليها تكت احمر او اصفر فيه السعر ومعلومات المنتج كل اللي عليك تنقلها للورقة .. اي استفسار عندك تقدر تسأل الموظفين الموجودين في كل قسم.

على فكرة الاثاث الموجود في صالة العرض هو شكل المنتج النهائي بعد التركيب .. كل منتجات ايكيا بتيجي قطع مفككه وانت بتجمعها لما توصل البيت

وانت بتلف لو تعبت من التدوير تقدر تاخد رست صغير في مطعم ايكيا عندهم اختيارات جميلة واسعارها معقولة جداً.

بمجرد ما بتخلص كتابة الحاجات اللي عجبتك في الورقة عندك اختيارين .. الاختيار الاول انك تخدم نفسك بنفسك يعني تنزل المخزن وتاخد السترولر تجمع كراتين القطع اللي عجبتك من على الرفوف .. هاتلاحظ ان غالبية منتجات ايكيا محطوطة في قطع مفككه في كراتين مسطحة علشان تسهل النقل. بمجرد ما تلاقي كل اللي بتدور عليه تروح على الكاشير تحاسب وتاخد الحاجات لبيتك بعربيتك.

الاختيار التاني اللي انا استخدمته ودا اللي هاتكلم عنه في السطور الجايه

الاختيار التاني اللي انا اخترته هو اختيار التوصيل للمنازل ودا انصح بيه اي حد هايفرش البيت كله من ايكيا .. بمجرد ما خلصت كتابة قطع الاثاث اللي محتاجها رحت بالليستة لموظفة ايكيا استفسر منها على الاختيارات الموجودة عندي .. قالت لي بتنزل المخزن وتجمع القطع وتروح بيها للكاشير وتطلب خدمة التوصيل للمنازل وهاتكون بحوالي 70 دولار والاثاث يوصلك بكره لحد باب البيت (باب بيتك لو انت ساكن في عمارة) .. قالت لي لو تحب احنا نجمعلك القطع من المخزن التكلفة بتكون حوالي 30 دولار .. قلتلها طبعا ياريت انا اصلا مش هاقدر انزل المخزن واحط كل القطع دي لوحدي على الترولي لغاية الكاشير .. الموظفة اخدت من الليستة ودخلت البيانات على الكمبيوتر واخدت مني بياناتي علشان التوصيل بكره وطبعتي لي الفاتورة بتاعتي .. علشان ادفع رحت عند الكاشير وزي مافي اماكن كتير في كندا دلوقتي بتحط ماكينات الself-serve (ادفع بنفسك من غير الكاشير) رحت على اول جهاز فاضي عملت سكان للباركود ودفعت بالكريديت كارد واخدت ايصال الدفع وروحت.

فاضل بقى أحكيلكم باقي القصة مع التوصيل (الدليفري) في اليوم اللي بعده

تاني يوم جاتلي على الموبايل مكالمه من شركة الدليفري ان التسليم هايكون في خلال نصف ساعه (بحسب الوقت المتفق عليه سابقا) وان لازم يكون في حد كبير فوق 18 سنه في البيت لحظة التسليم .. لاني ساكن في عمارة عمال الدليفري اتصلوا بيا مرة تانية قبل وصولهم ب5 دقايق علشان استناهم على باب العمارة علشان يقدروا يدخلوا .. الناس وصلت في ميعادها وبمنتهى الاحترام دخلوا الكراتين لحد البيت ومضيت على استمارة الاستلام وفيها اني استلمت القطع كاملة وانها وصلت في الميعاد وسليمة ومافيش اي تلفيات في المبنى نتجت عن عملية النقل .. مضيت على الورقة وشكرتهم وهما مشوا وبدأت أنا مهمة التركيب :)

كل حاجات ايكيا بتيجي قطع في كراتين .. بتفتح الكراتين وتطلع القطع وتقرا الكاتالوج اللي بيشرحلك بالصور بالتفصيل طريقة التجميع .. كل حاجة موجودة في الكرتونه حتى المسامير ومفكات الربط الخاصه بها (احتياطي انا كنت عديت اليوم اللي قبلها على دولاراما جبت شاكوش وطقم مفكات وبعض الادوات تنفع في البيت) .. بالنسبة لي كانت تجربة ممتعه اني اتولي تجميع القطع وتركيبها .. لكن الاختيار ليك لو تحب الشركة تتولى عمليه التركيب Assembly نظير تكلفة إضافية فدا متاح برده .. بعد عملية التسليم جاتلي مكالمة مرة تانية من شركة الدليفري survey على عملية التسليم .. حقيقي كنت مبسوط جدا من الخدمة والتجربة ككل

بكدا اكون نقلت لكم تجربتي في شراء الاثاث من ايكيا .. اتمنى تكون مفيدة واضافت معلومة جديدة .. ربنا معاكم