قيادة السيارات وقواعد المرور في كندا

فكرت أخصص موضوع عن سواقة العربية في كندا .. أتمنى إن الموضوع يكون مفيد لكل اللي هايقراه .. لو انت هاتأجر عربية أول ما توصل المطار أو داخل إمتحان سواقة نظري أو عملي أو حتى مجرد بتقرا الموضوع من باب العلم بالشيء .. اذكرني في صلاتك .. أنا مش عايز أكتر من كدا

قبل ما نبدأ عايز أقولك إن كتاب المرور بيختلف من مقاطعة للتانية .. علشان تقرا أو تحمل الكتاب الخاص بمقاطعتك اختار اللينك الخاص بيها

اونتاريو
http://www.mto.gov.on.ca/english/dandv/driver/handbook/

كيبيك
http://www.saaq.gouv.qc.ca/en/documents/pdf/index.php

بريتش كولومبيا
http://www.icbc.com/driver-licensing/driving-guides/Pages/Learn-to-Drive-Smart.aspx

ألبرتا
http://www.transportation.alberta.ca/733.htm

هاحاول اضيف معلومة جديدة في كل مشاركة .. ويارب الموضوع يعجبكم

الامان :
مش محتاج اقولك انك لازم تربط حزام الامان سواء بتسوق او قاعد جنب اللي بيسوق او حتى المقاعد الخلفية

الأطفال على حسب سنهم يجب إستخدام إما ال Child Car Seat او Booster Seat

بالنسبة للChild Seat ممنوع وضعه على الكرسي الأمامي، كرسي الطفل المولود حتى عمر سنة ووزن 9 كجم يوضع على المقعد الخلفي ووجهه للخلف، ثم من وزن 9 إلى 18 كجم يوضع على المقعد الخلفي ووجهه للأمام.

أما الBooster Seat فهو يستخدم للأطفال التي تجاوز وزنها 18 كجم ليساعدهم على الوصول إلى إرتفاع مناسب لإستخدام حزام الأمان للكبار، وهو يستخدم حتى يصل الطفل لعمر 9 سنوات أو يصل طوله إلى 145 سم

بعد ذلك يستخدم الأطفال حزام الأمان فقط ولكن يجب أن يبقوا بالمقعد الخلفي حتى سن 12 سنة.

الحلقة الثانية التقاطعات :

حق الطريق أو أولوية العبور دائماً للمشاه

عليك إستخدام أنوار إشارات سيارتك عند تغيير الحارة ، الدوران لليمين أو اليسار

يجب أن تقف بسياراتك قبل الخط الأبيض في حالة تغير لون الإشارة إلى الأحمر أو هناك علامة توقف STOP sign. لا يمكنك مجرد تهدئة السرعة إذا لم تتوقف السيارة تماماً فهي مخالفة مرورية.

الإشارة الصفراء تعني أن عليك التوقف إلا إذا تغيرت الإشارة من الأخضر إلى الأصفر وأنت تعبر التقاطع ولم يكن في إمكانك التوقف بأمان بسبب سرعتك والسيارات خلفك

في التقاطعات التي تنظمها علامات التوقف على الأربع جهات والتي تعرف باسم four-way stops السيارة التي تصل أولاً إلى التقاطع وتتوقف تماماً أولاً تعبر أولاً.
في حالة وصول سيارتين للتقاطع في نفس التوقيت فالسيارة على اليمين لها حق العبور أولاً.

معلومات أكثر تجدها في هذا الفيديو:

وهذا الفيديو أيضاً .. برجاء الإنتباه إلى قواعد الدوران لليسار تحديداً 

الحلقة الثالثة: الإنتظار (الركنه)
لازم تعرف أن الركنة في المواقف التالية مخالفة تعرضك للغرامة أو سحب عربيتك:
1- ممنوع الركنة فوق الرصيف
2- ممنوع سد طريق الdriveway (مداخل البيوت) أو التقاطعات
3- ممنوع الركنة في مسافة 5 متر من حنفية الحريق
4- ممنوع الركنة في مسافة 6 متر من التقاطعات ، خطوط عبور المشاة ، إشارة أو علامة مرور
5- ممنوع الركنة في مسافة 15 متر من قضبان السكة الحديد
6- ممنوع الركنة في حارة مخصصة للعجل
7- ممنوع الركنة على كوبري أو في نفق
8- ممنوع تركن عربيتك بطريقة تغطي على رؤية لافتات المرور
9- ممنوع الركنة لما تكون فيه يافطة بالكلام دا أو الرصيف مدهون أحمر أو أصفر
10- ممنوع الركنة في المساحات المخصصة للمعاقين

شروط الركنة:
العربية تكون موازية للرصيف وتبعد عنه 30 سم
لو راكن على ارض صاعدة uphill لف الدركسيون شمال
لو راكن على ارض منحدرة downhill لف الدركسيون يمين
ضع الgear على وضع الباركينج وارفع فرامل اليد

فيديو مفيد عن الـParallel Parking

فيديو مفيد عن الـReverse Parking

الحلقة الرابعة: Blind Spots
حتى لو ظابط مرايات العربية على الوضع الأمثل فيه مساحات كبيرة انت ماتقدرش تشوفها في المرايه وهي دي اللي بنسميها الblind spots او ممكن نترجمها النقاط العمياء. أكثر مناطق الblind spots خطورة هي الأجناب ، أيضاً هناك المنطقة تحت مستوى النظر في الأمام والخلف ، الصورة الجايه هاتوضح لك أكتر

كل مرة بتغير حارة أو بتلف يمين أو شمال محتاج تبص فوق كتفك (بيسموه shoulder check) علشان تأمن إن الblind spot في الجانب دا فاضي  .. ماتنساش كمان تبص في المراية وت shoulder check قبل ما تفتح باب العربية وتخرج منها.
نقطة تانية محتاج دايما علشان تسوق كويس وتقدر تتحكم بالعربية وتوقفها في حالات الطواريء إنك تحافظ على مسافة أمنه بينك وبين العربية اللي قدامك واللي وراك .. المسافة الأمنة بينك وبين العربية اللي قدامك عادة بتكون ثانيتين محتاج تزودها في حالات الطقس السيء أو على الطريق السريع أو لو قدامك truck.
لما بتقف ورا عربية حافظ على مسافة أمنه بينك وبين العربية اللي قدامك .. لازم تكون شايف إطارات العربية قدامك وإلا انت كدا قريب أكتر من اللازم.
الحاجة الأخيرة بالنسبة لعربيات الtruck إن عندها blind spots أكبر بكتير من عربيتك وخصوصاً كمان في الخلف .. كقاعدة عامة إذا انت مش قادر تشوف مراية الtruck الجانبية فالسواق كمان مش شايف عربيتك.

الحلقة الخامسة: مشاركة الطريق

المشاة:
المشاه ليهم الأولوية في العبور دائماً، وانت بتعدي أي تقاطع أو منطقة عبور مشاه (حتى لو الإشارة خضراء) لازم تتأكد كويس انه مافيش مشاه.

المدارس والملاعب:
انتبه لمنطقة المدارس والملاعب. التزم بالسرعة الموضحة ولا تتجاوزها (30 كم عادة). اتبع تعليمات الشخص اللي بينظم العبور في منطقة المدرسة لو كان موجود.

العجل:
راكبو الدرجات لهم نفس الحقوق والمسئوليات على الطريق تماماً كالسائقين. لو الشارع متعدد الحارات وانت عايز تعدي العجلة ماتزاحمش العجلة في نفس الحارة، غير الحارة بتاعتك زي ما بتعمل بالظبط مع العربيات.

الموتوسيكلات:
ماتحاولش أبداً تشارك نفس الحارة مع الموتوسيكل وحافظ على المسافة دايما بينك وبينه.

العربيات الكبيرة:
لازم تزود المستفة بينك وبين الtruck. العربيات الكبيرة زي الباص واللوري عندها blind spots اكبر من العربيات، خليك متأكد إنك شايف المرايتين الجانبيتين بتوع العربيات الكبيرة علشان تتأكد انك بعيد كفاية. العربيات الكبيرة محتاجة مساحة اكبر في الدورانات.

باص المدرسة:
لما باص المدرسة بيقف علشان ينزل الاولاد هاتلاقيه مشغل فلاش النور العلوي وفتح إشارة STOP حمراء جنب السواق. لازم العربيات على كلا جانبي الطريق تقف في الحالة دي.

عربيات الطواري:
عربيات الشرطة والإسعاف والمطافي بمجرد تشغيلها السرينة المميزة وأنوار فلاش لها الأولوية في المرور. العربيات في كلا الإتجاهين لازم تركن يمين وتقف تماماً في الحالة دي.

مناطق الإنشاء:
ابطء السرعة واتبع الارشادات والاسهم والعلامات لما تدخل على Construction zone وسيب مسافة جانبية مناسبة. اتبع إشارة الشخص اللي بينظم المرور واقف لو رافع علامة STOP. عادة لما بيكون فيه إصلاحات أو إنشاءات بيحتاجوا يقفلوا بعض حارات الطريق استعد من بدري وغير حارتك.

القطارات:
لما الطريق بيتقاطع مع قضبان القطار هاتلاقي علامة X كبيرة، ابطء سرعتك واسمع وبص للناحيتين علشان تتأكد إنه مافيش قطار قبل ما تعدي القضبان. لو القطار جاي، لو لقيت أنوار فلاش / جرس / بوابه لازم تقف على مسافة 5 متر على الأقل لغاية ما القطار(ات) تعدي والطريق يبقى أمن.

أتمنى إني أكون وفقت في تقديم الموضوع ويكون مفيد لكل اللي بيقراه. وانا باكتب الموضوع كنت براجع على المعلومات من كتاب المرور لكن أحب أكد إن المعلومات اللي هنا استرشادية فقط ولا تغنيك عن قراءة كتاب المقاطعة بتاعتك علشان تتأكد من صحة المعلومة وأخر التحديثات.